Cumenti est cambiada sa sotziedadi

di Ermanno Garau ___________________________ In custus ultimus annus c’est stau unu cambiamentu mannu in sa Sotziedadi nostra; e cust est dèpiu a varias causas chi ant influiu in su modu de si cumportai e de pensai de medas personas. Deu apu girau su mundu e s’Italia intera; apu viagiau meda in trenu, cosa chi prima fiat unu veru prexeri; prus bortas, m’est capitau de depi fai puru cincui oras de viagiu; e fiat, custa, una bona ocasioni po connòsciri atras personas e culturas diversas. Fueddaiaus de medas cosas e puru de is problemas per- sonalis nostrus; e in cussas pagus oras de discussionis e de cunfrontu tra is ideas, si connosciant personas cun is calis si stabiliat unu veru raportu de sinceridadi e de amicitzia. Oi vaggiai in trenu est totu un’atra cosa; casi totus, chene fai distintzionis tra giovunus e becius, abàrrant impenniaus totu su tempus cun su telefoninu in manus e raramenti s’agàtat calincunu dispostu a fueddai; cosa chi fiat meda importanti poita, a parti ca ti fadiat bolai su tempus de su viagiu, ti fadiat cresci puru a livellu personali. E oi, puru caminendi in sa strada, est una cosa meda rara incontrai calincunu chi ti castiat in faci; candu invecias custu sussedit, mi firmu ddu chistionu e ddi fatzu is cumplimentus, poita at tentu su coragiu de mi castiaiai aintru de is ogus. Custa est sa dimostratzioni de cumenti in sa Sotziedadi si siat pèrdiu su sensu de biviri in cumunioni. Meda tempus fait, puru cun sa vera poberesa chi ci fiat, s’unioni e s’agiudu tra si personas, contribuiant in modu importanti a alleviai totus is suferentzias chi si patiant. Custa gravi situatzioni est, in bona parti dèpia, puru, a medas trasmissionis fatas de sa televisioni e a sa propaganda de tzèrtus politicus chi, po teni su cunsensu, funt arrennescius a conditzionai sa genti e a si fai separai tra nosu, fadendi triunfai s’egoismu e su ratzismu, chi mègant de cresci dònnia dii de prus. E custu modu de pensai, chene nisciunu sensu sotziali, est imoi intrau in sa conca de sa maiori parti de su pòpulu; parrit chi s’Italia non si rendat po nudda contu de sa gravi situatzioni in sa cali s’agàtat!. Chi in d’una Sotziedadi si perdint totus custus valoris, chi funt fundamentalis e non c’est prus su rispetu po is atrus e su sensu de sa vida in cumunidadi, non si podit cunsiderai una vera Sotziedadi, ma unu modu de biviri chi non tenit nudda de umanu. E de custa gravi situatzioni mègant de ndi subiri is efetus, massimu is giovunus; e custu ddu podeus biri castiendi su cumportamentu insoru: atzionis de “bullismu”, àlculu e droga, funt diventadas cosas prus che normalis; e po si poni in mostra, cosa chi fait parti de sa natura umana, medas bortas funt dispostus a sacrificai sa vida insoru puru, bastat a biri su chi sussedit dònnia dii in “facebook”, chi po mei est unu de is verus responsabilis de custas gravis situatzionis, chi dimostrant, craramenti, ca custus giovunus funt is veras vitimas, che ...