Pietrinu est sètziu a cuaddu e portat a coddu unu sacu de mangimi. Ecu ca incontrat s’amigu Ginettu
Ginettu: Ma nara o Pietrinu. Ma la ca ses tontu. Poita portas cussu sacu a coddu, asub’e su cuaddu?
Pietrinu: Po arrespetai cust’animali. Aici totu su pesu, no pesat asuba de su cuaddu!
………………………………………………………………………………………………………………………………………………………….
Ubertu est in giru fueddendi cun su gopai Gaudenziu
Gaudenziu: E insandus ita mi contas?
Ubertu: E ita bolis chi ti conti.
Gaudenziu: Nara, comenti andat cun pobidda tua?
Ubertu: Mali. Meda mali.
Gaudenziu: Poita andat mali?
Ubertu: Po su motivu, ca no fait atru che mi fueddai de su primu pobiddu.
Gaudenziu: Tontixeddu ses! E tui insandus fueddaddi de sa pròssima pobidda. Ca bis comenti ddi passat!
……………………………………………………………………………………………………………………………………………………………………..
Rinu e Pinu funt fuedendi de pisitus
Rinu: No parris berus, a nai ca su pisitu miu est bessiu vegetarianu.
Pinu: Comenti fais a ddu nai, ita dd’as biu papendi birdura?
Rinu: No scéti papendi birdura, ma puru gioghendi a cartas cun is topis.
Pinu: Balla, su pisitu miu inveci est sempri cassadori, pensa ca s’apostat acanta de s’edicola, po biri candu bessit “Topolino”!
……………………………………………………………………………………………………………………………………………………………………
Mundicu est in barberia po si fai is pius
Su barbieri: Sigumenti ddi funt abarraus scéti tres pius, comenti ddus bolit?
Mundicu: M’iat a praxi cun sa scriniera in mesu.
Su barbieri: Mi dispraxit meda, ma si dda potzu fai scéti a manca o a destra, in mesu non est possìbili, poita is pius fut dispàris! No potzu miga sperrai unu piu in duus!
……………………………………………………………………………………………………………………………………………………………………….
Irmio incontrat s’amigu Lorenzu
Lorenzu: Ciau, ge fiaus una dì chene si bì! E insandus coment’andat sa vida matrimoniali?
Irmio: Fadendi is corrus, si podit nai ca ge andat beni!
…………………………………………………………………………………………………………………………………………………………
Armandu est fueddendi cun Bastianu
Bastianu: Ma tui, aundi est su logu prus stranu aundi as fatu s’amori?
Armandu: In dd’unu matallafu
Bastianu: Bho! Arratz’e de logu stranu. Totus ddu fadeus inguni!
Armandu: Naras? Ma deu, dd’apu fatu in dd’una espositzioni. In dd’unu negòtziu, aundi ddus bèndiant!
...............................................................................................................................................................
Marieddu est torrau de scola e est fueddendi cun su babbu
Marieddu: O babbu, ma tui scis scrii a ogus serraus?
Su babbu: Certu ca ci arrenèsciu.
Marieddu: Insandus, s’est bonu puru a poni una firma cun su nòmini tuu?
Su babbu: certu!
Marieddu: insandus serra is ogus, e ponimì una firma in sa pagella!
………………………………………………………………………………………………………………………………………………………………
Gervasina est fueddendi cun su pobiddu Mattia
Mattia: mi depis nai chi ti praxint de prus is òminis bellus o cussus inteligentis.
Gervasina: ne is unus ne is s’atrus. A mei praxis tui!
………………………………………………………………………………………………………………………………………………………………….
Is gopais Chichinu e Ballicu funt imbriagus
Ballicu: No parrit berus. Apu biu in televisioni a ca nanca unu camellu podit traballai una cida sene bufai nudda!
Chicchinu: O gopai! Atru che nos! Ca podeus abarrai una cida bufendi sene traballai!
…………………………………………………………………………………………………………………………………………………………………..
Marildu est chistionendi cun sa pobidda Sidora
Marildu: Ma no t’arregordas ca cras po nos est festa?
Sidora: Festa? Ma ita festa?
Marildu: A cras fadeus cincuant’annus chi seus coiaus.
Sidora: E insandus?
Marildu: E insandus tocat a festigiai
Sidora: Festigiai? Deu ia a nai inveci de fai cincu minutus de silèntziu!
