>
Zebedia est crocau cun sa pobidda Sinzilla
Zebedia: Nara, ddas intèndiu su tzàchidu mannu de su tronu de custa notti?
Sinzilla: No. Non apu intèndiu nudda. Fia dromida beni.
Zebedia: Certu. Tui mancai dromida s’ùnica cosa chi ti funtzionat funti is origas po intendi is tròddius mius!
Sinzilla: Prus che is origas, po intendi is tròddius tuus, mi funtzionat tropu beni su nasu, po intendi su fragu!
.......................................................................................................................................
Gigliosu est fueddendi ananti de campusantu cun s’amigu Corbeliu
Corbeliu: Dd’as biu chi est intrau a campusantu?
Gigliosu: Eja. No fiat Bertucciu cun totu is fillus?
Corbeliu: Si fiat cussu. Ma ddu scis poita a arregolli totus is fillus impari?
Gigliosu: Poita ddu fait?
Corbeliu: Ddu fait po arresparmiai is froris de poni in sa tumba de sa pobidda.
Gigliosu: No cumprendu ita bolis intzirai.
Corbeliu: Bollu intzirai, ca portat totus is fillus impari, po ddus poni acanta de sa tumba, poita de nòmini si tzèrriant, Narcisu, Giacintu, Margherita, Rosa, Ortensia e Gigliu e aici no spendit comporendi froris.
.......................................................................................................................................
Sigismondu incontrat sa filla Nutilla chi est po ci bessì in giru
Sigismondu: Nara, aundi depis andai.
Nutilla: Seu andendi in discoteca a baddai.
Sigismondu: Ma biu ca ci ses bessendi chene mudandinas. Si bit craru craru.
Nutilla: Poita fostei babbu, candu andàt a unu concertu, ita si poniàt unu tapu ne is origas?
.......................................................................................................................................
Repettu incontart s’amigu Amuigi in carrozzella
Repettu: Ma ita t’est sucèdiu. Ti biu in carrotzella.
Amuigi: Apu tentu un incidenti stradali.
Repettu: Ma ita ses abarrau paralizau?
Amuigi: Ma cali paralizau. Seu fadendi fintas e aici m’ant pagau s’assicuratzioni.
Repettu: Ma ita ses scemu? Imoi ti tocat a fai finta po sempri de essi paralitìcu.
Amuigi: No ti dda cretas chi siat a ici. Cida ch’intrat depu andai a Lourdes. E ndi torru miraculau e in peis!
.......................................................................................................................................
Borlotta est in dd’unu ristoranti candu arribat su camerieri
Su camerieri: Mi dica, cosa le porto?
Borlotta: Ita cosa mi consillat. Portimì calincuna cosa chene glùtine.
Su camerieri: Poita chene glùtine?
Borlotta: Poita seu celìaca.
Su camerieri: No dd’ia p’essi crètiu mai ca fostei fiat cèliaca.
Borlotta: Po cali motivu no nci creit?
Su camerieri: Poita de comenti fueddat mi parrit chi fostei siat sarda!
.......................................................................................................................................
Tzia rosmella est in sa firmada de sa corriera in sa statzioni de oristanis e domandat a s’autista
Tzia rosmella: Scusimidda signor autista, mi podit donai una informatzioni?
S’autista: Certu sa tzia, domandit puru.
Tzia rosmella: Ia boli sciri, si custa corriera andat a Abbasanta.
S’autista: Nossi sa tzia, custa corriera po imoi andat a Gasoliu!
.......................................................................................................................................
Corolla est in giru candu incontrat a sa sorresta Fasolina
Fasolina: Ciau sorresta, ita dimòniu tenis totu sciancada?
Corolla: Est po culpa de pobiddu miu chi seu totu lumbada.
Fasolina: Ita cosa? Ita ti fait?
Corolla: Est candu fadeus s’amori. Sa bella est ca nanca su pobiddu est la “dolce metà” e inveci pobiddu miu pesat centu killus atru che metadi!
.......................................................................................................................................
Roncaliu est bufendi in su bar cun s’amigu Antellu
Antellu: Nara o Roncaliu, t’iat a praxi a fai s’amori in tres?
Roncaliu: Ti depu cunfessai, ca est una cosa chi apu sempri disigiau.
Antellu: Insaras curri in pressi, ca apu biu s’amanti de pobidda tua intrendi a domu tua!
......................................................................................................................................
Duranti sa missa su predi est fadendi sa prèdica
Su predi: Comenti si narat: “chi tra di voi non ha mai peccato scagli la prima pietra!” Oci, oci oci sa conca!
........................................................................................................................................
Marieddu cun su babbu Sebastianu
Marieddu: Babbu, ti potzu fai una domanda?
Sebastianu: Certu fillu miu, ita mi depis pedì?
Marieddu: Ia boli sciri candu est sa festa de nonna, sa mamma de mamma?
Sebastianu: Se festa de nonna tua, est candu si ndi andat a domu sua!
Marieddu: O babbu, e candu est sa festa tua?
Sebastianu: Candu mamma tua non est in domu!
.......................................................................................................................................
Gerundiu est in tribunali interrogau de su giudici
Su giudici: Mi depit spiegai po cali motivu at tzacau una puntada de pei a sa brenti de sa sroga.
Gerundiu: Est culpa sua.
Su giudici: Poita culpa de sa sroga? Spieghimidda sa cosa.
Gerundiu: Poita sroga mia s’est girada totu a una borta!
........................................................................................................................................
Duus piciocheddus Marieddu Pillimeddu funt fueddendi
Pillimeddu: O Marieddu, scòvia, ma osatrus in domu, prima de prandi e cenai pregais?
Marieddu: No, nos no pregaus. Poita mamma ge coxinat beni!
........................................................................................................................................
Rosabella est torrada a domu e su pobiddu Ginu est meda arrennegau
Ginu: Ma aundi stocada fiasta totu su merì.
Rosabella: Fia in su saloni de bellesa.
Ginu: Si? E as spèndiu dinai?
Rosabella: Certu, ellu gràtis.
Ginu: Aici est! Insaras curri in pressi a ti fai arrimborsai.
Rosabella: Po cali motivu nara.
Ginu: Poita ses prus lègia da de prima!
.......................................................................................................................................
Marieddu est in campagna cun su babbu Onorio, candu bint unu proceddu pascendi
Onoriu: Bis o Marieddu, custu est un proceddu de latti.
Marieddu: Ge ddu biu babbu. E fueddat comenti tui, candu ses dromiu!
........................................................................................................................................
Serina si presentat in farmacia
Serina: Buonasera: m’iat a serbì una dose de arsenico.
Su farmacista: Poita ddi serbit s’arsenicu? Ge dd’at a scit ca est unu velenu mortali.
Serina: Ge ddu sciu ca est velenu mortali. Ma mi serbit a posta po bòciri a pobiddu miu.
Su farmacista: Da portat sa retzeta? Oghinò no si dda potzu donai.
© Riproduzione riservata