di Larentu Argiolas
De una pariga de annus a oi, me in Santu ‘Èngiu est torrada sa gana de fai arti. Is bias de sa bidda funt torradas a nasci gràtzias a murus coloraus. Totu custu gràtzias a s’assòtziu Skizzo, unus cantu de amigus chi si funt agataus po arregordai un’amigu chi fiat mortu de pagu, fut s’atòngiu de su 2013 e Simone Farci, po totus Skizzo, no nci fiat prus. De custu atòbiu est nàscia s’’idei de pintai unu muru e de lìmpiai puru una pratza de sa bidda in onori de s’amigu Skizzo. Duncas, in s’istadi de su 2014, is piciocus ant pediu s’agiudu de Iroxi Casu, un’artista santuingesu connotu in mesu mundu, chi at trabballau cun issus po ndi stantargiai sa primu òpera de custu bellu movimentu: “Sa vida est bella”. Apustis perou is piciocus ant detzìdiu de no si firmai e, sèmpiri cun s’agiudu de Iroxi Casu, ant fatu òperas comenti cussa dedicada a Lionora de Arbarei. Ma sa ‘idei, in s’interis, s’est amanniada. In sa bidda, ma in foras puru, est crèscia sa crosidadi e su prexu. Difatis ant incarrerau a benni in Santu ‘Èngiu unu niaxi de artistas, sardus, italianus e de totu su mundu. Imoi in totu sa bidda ddoi funt prus de sessanta murales, de medas artistas diversus e medas àterus artistas chi tenint totus su stili insoru. Agataus duncas un’òpera dedicada a Grazia Deledda pintada de Leticia Mandragora, ddoi est Gigi Riva, òpera manna de s’artista locali Mamblo, chi at fatu David Bowie puru e àterus musicistas me in sa pratza de sa mùsica; ddoi est unu Messaju puru, de s’artista argentinu Alaniz, chi s’agatat a faci de “Su lèpuri de argiola”, òpera pintada sèmpiri de Iroxi Casu. Is ùrtimas òperas funt “Echilibru” de Millo e “Arrosu e tzafaranu” de Tellas.
Ma s’agatat fintzas una bia cuncordada totu de murales. Est cussa intitulada “Bia Lionora de Arbarei” ma unus cantu de annus fai fiat connota comenti “Su bixinau de Aristanis”. In cust’arruga Sergio Putzu, àteru artista de bidda meda connotu, at pintau is faciadas de is domus andendi a ndi stantargiai prus de trinta òperas chi at nomenau “Tziviltadi messaja”.
Candu si fueddàt de murales in Sardìnnia si pensàt sèmpiri a Orgòsolo e Santu Sperau, imoi Santu ‘Èngiu puru est arremonada comenti una bidda innui si podint agatai òperas diversas e de valori artìsticu mannu.
Podeus nai ancora unus cantu de cosas apitzus de custas òperas, perou iat a essi mellus a ddas biri, lassendi fueddai is coloris de is murus prusaprestus ca cussus (arrubiu, arangiu e grogu) de s’apretu chi seus bivendi.
© Riproduzione riservata